Дылывысты өскертпээли.

Дыңгылдайның хөөнүнге үдеттирген,
Дыңнап ханмас чараш үннүг, хүндүткелдиг,
Тыва чоннуң бурун шагдан эдилээни
Тыва дылым чиде бээрин күзевес мен.

Өске черге чоруп чорааш, хенертен
Өскен чуртум дылын дыңнааш, серт кынныр мен.
Танышпасты, билишпести ырак черге
Таныштырып, эштештирер тыва дылым.

Аас-чогаалдың шыгжаттынган, мөңге артар
Аңгы-аңгы хевирлерин шинчилээрге,
Өңгүр, чараш, дыңнаксанчыг аялгалыг,
Өске сөс чок, тыва сөстер каастаан болур.

Тыва дылды арыг хевээр артырарда,
Тыва чоннуң медерелин кыйгыраалы,
Дылывыстың чаражының чажыттарын
Дилевишаан, шын ажыглап, хүндүлээли.

Өткүт, чараш адаттынар үннерлиг
"Ө", Ң" биле "Ү" деп тускай үжүктерлиг
Дыңнаксанчыг, адаксанчыг, чоргаар үннүг
Дылывысты бокталдырып, өскертпээли.

Чечек Салгын-оол (Ак-Довурак),
17.10.2020, 04:20, Тожу.